Av Silje Pileberg
Publisert 18. desember 2024 kl. 09:37
Line With har i over to år prøvd å få endra fleire faktafeil om farens Rottefella-binding som er utstilt på Nasjonalmuseet. Nå beklagar Elsebet Kjerschow, seniorrådgjevar for samlingsutstillinga på Nasjonalmuseet, overfor With.
– Her har det skjedd ein glepp, og eg veit ikkje kvifor, seier ho.
– Men With tok kontakt fleire gonger, først via desken, så ved fleire e-postar. Korleis kan det gleppe så mange gonger?
– Eg har ikkje noko godt svar. Trass gode rutinar kan det nok skje at ting ikkje blir fanga opp. Vi ønskjer oppriktig tilbakemeldingar frå publikum og gjer vårt beste for å rette opp feil.
Frå opninga i juni 2022 og ut 2023 blei totalt 100 etikettar skifta ut, i fleire omgangar. 20 gjaldt faktafeil som var registrerte anten av publikum eller museumstilsette. Dette er lite, sett opp mot at det er 6500 verk utstilte, meiner Kjerschow.
With fekk på eit tidspunkt tilbakemelding om at museet måtte samle opp mange feil før dei kunne rettast. Dette reflekterer ikkje måten museet jobbar på, ifølgje Kjerschow.
– Av og til samlar vi opp bestillingar på nye etikettar, men då er det snakk om få vekers ventetid. Det som kan ta tid, er å sjekke opplysningane: Dette må gjerast ved hjelp av fleire kjelder, og viss kjeldene er usamde, oppstår faglege samtalar. Heller ikkje ein familierelasjon garanterer korrekt kunnskap, seier ho og legg til:
– Samlinga til museet er også i kontinuerleg endring, og ny kunnskap kjem heile tida til.
Kuratorane er spesialistar på sine felt og har det faglege ansvaret for etikettane, ifølgje Kjerschow. Museet endrar feil fortløpande, men enkelte feil, som kommafeil, er så små at dei kan bli sette på vent til etikettane likevel må skiftast ut.
Ho opnar for at museet kan få enda betre rutinar: Her jobbar museet kontinuerleg, og responsen frå publikum er viktig, poengterer ho.
Kommersiell direktør Are Grongstad meiner at dei eksisterande rutinane er gode.
– Kvar veke blir tilbakemeldingar frå publikum fordelte på dei rette mottakarane. Alle blir vurderte, og viss det trengst spesiell fagkompetanse, blir desse sende vidare til riktig fagavdeling som svarer direkte, skriv han på e-post.
– Kva når folk seier at dei ikkje kontaktar dykk lenger, fordi dei opplever at dei ikkje blir høyrde?
– Tilbakemeldingar frå publikum er viktige for oss. Det hjelper oss med å justere og betre tilbodet vårt. Vi tar imot tilbakemeldingar om alt, frå fasilitetar i museet til kunstfaglege spørsmål.
– Kva med dei som ikkje finn ut kven dei skal kontakte?
– Vi ønskjer at det skal vere enkelt å kome i kontakt med oss. Kvar dag møter vi publikum i museet og vi er tilgjengelege via telefon, e-post eller sosiale media. På nettsidene finst også kontaktinformasjon til alle tilsette.
Nasjonalmuseet ønskjer ikkje å utdjupe svaret på siste spørsmål nærmare.
